༧གོང་ས་མཆོག་གིས་ཐེ་ཝན་གཙོས་དད་ལྡན་པ་སྟོང་ཕྲག་མང་པོར་ཆོས་འབྲེལ།

2019-10-03
གློག་འཕྲིན།
མཆན།
Share
པར་བཀོད།
སྤྱི་ནོར་༧གོང་ས་མཆོག་གིས་ཐེ་ཝན་གཙོས་དད་ལྡན་པ་སྟོང་ཕྲག་མང་པོར་ཆོས་འབྲེལ་སྐབས། ༢༠༡༩།༡༠།༣
སྤྱི་ནོར་༧གོང་ས་མཆོག་གིས་ཐེ་ཝན་གཙོས་དད་ལྡན་པ་སྟོང་ཕྲག་མང་པོར་ཆོས་འབྲེལ་སྐབས། ༢༠༡༩།༡༠།༣
Photo: RFA

མི་སྒེར་གྱི་མི་ཚེ་སྐྱིད་པོ་ཞིག་ཡོང་མིན་ནི་འཛམ་གླིང་སྤྱིའི་མིའི་སྤྱི་ཚོགས་དང་འབྲེལ་བ་ཆགས་ཡོད་པ་༧གོང་ས་མཆོག་གིས་ཐེ་ཝན་གཙོས་དད་ལྡན་པར་ཆོས་འབྲེལ་སྐབས་བཀའ་བསྩལ་འདུག
ཐེ་ཝན་གྱི་དད་ལྡན་པ་ཚོགས་སྡེ་ཁག་གཅིག་གིས་ཇི་ལྟར་གསོལ་འདེབས་ཞུ་དོན་ལྟར། འཛམ་གླིང་གི་རྒྱལ་ཁབ་ཁག་༦༡་ནས་ཡོང་བའི་སེར་སྐྱ་ཕོ་མོ་བདུན་སྟོང་ལྔ་བརྒྱ་བརྒལ་བར། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ཉིན་གྲངས་གསུམ་རིང་སྩོལ་རྒྱུའི་དབུ་མ་རིན་ཆེན་ཕྲེང་བའི་སྒོ་ནས་གསུང་ཆོས་ཕྱི་ཟླ་ ༡༠ ཚེས་ ༣ ནས་དབུ་འཛུགས་གནང་ཡོད་པ་རེད།
༧གོང་ས་སྐྱབས་མགོན་ཆེན་པོ་མཆོག་གིས་རྒྱ་ནག་ཏུ་ནང་ཆོས་ཉམས་ཆག་ཆེན་པོ་སོང་ཡོད་ནའང་། དེང་སང་རྒྱ་ནག་ཏུ་ནང་ཆོས་ལ་དོ་སྣང་བྱེད་མཁན་ཇེ་མང་དུ་འགྲོ་བཞིན་ཡོད་པས་རྒྱ་རིགས་ནང་པའི་ཆོས་གྲོགས་ཚོས་སློབ་སྦྱོང་བྱེད་དགོས་པ་བཀའ་གནང་ཞིང་།  ༧གོང་ས་༧སྐྱབས་མགོན་ཆེན་པོ་མཆོག་གིས་ཆོས་ཀྱི་ཉམས་རྟོགས་ངོ་མ་དེ་ཆོས་སློབ་སྦྱོང་བྱེད་ནས་ཡོང་རྒྱུ་ཡིན་པ་ལས་ཁ་ནས་སངས་རྒྱས་ཀྱི་མཚན་སྔགས་གྲངས་གསོག་བྱེད་པ་ཙམ་གྱིས་ཡོང་རྒྱུ་མིན་པ་བཀའ་གནང་ཡོད་པ་རེད།
དེ་བཞིན་༧གོང་ས་༧སྐྱབས་མགོན་ཆེན་པོ་མཆོག་གིས་ཆོས་ལུགས་མི་འདྲ་བ་རྒྱུ་མཚན་དུ་བྱས་ཏེ་འཁྲུག་པ་བརྒྱབས་པ་ནི་ཧ་ཅང་གིས་སེམས་སྐྱོ་བོ་ཡིན་པ་དང་། དད་པ་དེ་སོ་སོའི་ཆོས་ལུགས་ལ་བྱེད་པ་དང་། གུས་པ་དེ་ཆོས་ལུགས་ཚང་མ་ལ་བྱས་ན་ཏག་ཏག་འགྲོ་ཡི་རེད་ཅེས་ལམ་སྟོན་གནང་བ་དང་། མི་སྒེར་གྱི་མི་ཚེ་སྐྱིད་པོ་ཞིག་ཡོང་མིན་ནི་འཛམ་གླིང་སྤྱིའི་མིའི་སྤྱི་ཚོགས་དང་འབྲེལ་བ་ཆགས་ཡོད་པས། འགྲོ་བ་མི་གཅིག་གྱུར་གྱི་འདུ་ཤེས་སྐྱེས་གལ་ཆེ་བ་བཀའ་གནང་གི་འདུག
ཐེ་ཝན་གྱི་བསྟན་འཛིན་བྱམས་ཆེན་ཆོས་ཚོགས་སོགས་ནས་ཡོང་བའི་རྒྱ་རིགས་དད་ལྡན་པ་ཚོས། ༧གོང་ས་མཆོག་གི་གསུང་ཆོས་ལ་ཉན་འདོད་ཆེན་པོ་ཡོད་པས། ལོ་རྟག་པར་བཞུགས་སྒར་དུ་གསུང་ཆོས་ཞུ་རུ་ཡོང་གི་ཡོད་པ་དང་། གལ་ཏེ་༧གོང་ས་མཆོག་ཐེ་ཝན་དུ་ཕེབས་ཐུབ་ན་ཁོང་ཚོས་ཧ་ཅང་བསྐལ་བཟང་པོ་ཡིན་པར་ངོས་འཛིན་གནང་གི་འདུག
ཡང་སོག་ཡུལ་གྱི་རྒྱལ་ས་ཨོ་ལན་བྷ་ཏར་ནས་ཆེད་ཕེབས་ཆོས་ཞུ་བ་ཞིག་གིས། སོག་པོའི་མི་རིགས་རྣམས་ནི་༧རྒྱལ་མཆོག་བསོད་ནམས་རྒྱ་མཚོའི་སྐབས་ནས་འབྲེལ་བ་ཤུགས་ཆེ་བྱུང་སྟེ། སོག་ཡུལ་དུ་༧གོང་ས་མཆོག་ལ་དད་གུས་ཧ་ཅང་ཆེན་པོ་ཞུ་གི་ཡོད་པས། ཁོང་ཚོ་མི་ཁག་ཅིག་ལོ་རྟག་པར་གསུང་ཆོས་ལ་བཅར་གྱི་ཡོད་པ་འགྲེལ་བརྗོད་གནང་གི་འདུག
ཡང་ཨ་མི་རི་ཀའི་བུད་མེད་ཨེ་མི་ཇོན་སི་ལགས་ཀྱིས། ད་ལྟའི་འཛམ་གླིང་གི་སྲིད་དོན་དང་ཆོས་ལུགས་ཀྱི་དཀའ་རྙོག་གནས་སྟངས་འདིར། ༧གོང་ས་མཆོག་གི་བྱམས་བརྩེའི་བཀའ་སློབ་ཁག་ཧ་ཅང་གལ་ཆེན་མཐོང་གི་ཡོད་པ་གསུངས་ཡོད་པ་རེད།
སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་བཀའ་སློབ་གྱི་མཇུག་ཏུ། ཡངས་སྟེང་རིན་པོ་ཆེ་མཆོག་གིས་ཆོས་བཤད་དང་ཆོས་ཀྱི་བགྲོ་གླེང་གནང་གི་ཡོད་པ་རེད།

མཆན། (0)
Share
དྲ་གནས་ཆ་ཚང༌།